Landloop
Parel Valleiers weet al te goed dat hulle sukses op die atlektiekbaan alreeds begin met hulle voorbereiding op die landloopbaan. Dis juis met deelname aan dié sport dat stamina gebou word.
Landloop word reeds van Parel Vallei se beginjare aangebied, maar dit is sedert die aanstelling van meneer Punt dat dié sport nou letterlik begin spoed optel! Die leerders word konstant aangemoedig om hulle eie tye te verbeter met behulp van die regte beplanning en kundige advies. Meneer Punt neem self ook nog gereeld deel aan wedlope en het al verskeie kere die Comrades Marathon voltooi. Sy doel is om dié sport in PV te neem op die pad van bemeestering deur: deelname aan nuwe wedlope en die Bolandliga, wat al ‘n jaarlikse instelling geword het.
PV se pragtige ligging aan die voet van die Helderberg bied ook die ideale oefenterrein aan leerders én hulle word goed voorberei op die verskeie uitdagings wat wedlope aan hulle mag bied. Die span seuns en dogters sweet saam as hulle Spookheuwel en die opdraandes van die Helderberg moet aandurf tydens oefensessies, maar sweef ook weer hoog saam as hulle goeie tye hardloop en beloon word vir hulle insette.
PRESTASIES
Onlangs het een van ons atlete, Mia Doyle, die Bolandspan gehaal en tydens die Bolandliga het twee atlete, Stephan Millard ‘n 4de plek en Alex Botha ‘n 5de plek in die seuns O.15-afdeling behaal.
Ons het vanjaar al aan verskeie “Parkruns” deelgeneem, waartydens ons atlete puik gepresteer het. Alex Botha het algeheel ‘n 3de plek behaal in die junior ouderdomsgroep en Gerhard Eckley spog met ‘n 20ste plek. Gegewe die feit dat daar meer as 1 000 atlete is wat weekliks deelneem, is hierdie puik prestasies!
Gedurende Mei neem ons altyd deel aan die SAD Safari-wedloop en hier het Stefan Millard weer naam gemaak toe hy die 10 km-wedloop in slegs 37 minute afgelê het!
AKTIWITEITE WAARAAN LANDLOOP-ATLETE GEDURENDE DIE JAAR KAN DEELNEEM EN UITSIEN:
- Weeklikse oefensessies by die skool teen ons steil en bekende bulte.
- Weeklikse 4 km-tydtoets aangebied deur die Strand Atletiekklub.
- Verskeie Bolandligabyeenkomste.
- Padwedlope (soos die SAD 10 km en Leapfrog van 10 km).
- “Parkruns”.
- “Trailruns” (Op die Lourensford-wynlandgoed met ‘n 5 km- of 10 km- opsie).
In die 3de kwartaal pak PV se drawwers ook die Wildrunner trial series aan wat bestaan uit 4 wedlope, sowel as die 5/15 km Spookheuwel-padwedloop wat gewoonlik ‘n hoogtepunt is.
IDEALE
Ons streef daarna om landloop by PV te laat groei deur so veel as moontlik atlete by landloop betrokke te kry, sowel as om ‘n fiksheidskultuur in ons skool te skep. Mag meer lede van ons PV-span ook binnekort in die Bolandspan wees.
Trek vandag nog jou tekkies aan en kontak meneer Punt of meneer Soekoe om deel te word van dié span.
